Kapado niniak mamak nan gadang basa batuah,
pucuak bulek jo urek tunggang,
nan gadang diajuang tinggi diamba gadang. Kapai tampek batanyo, ka pulang tampek babarito.
Nan bak umpamo kayu gadang di tangah koto.
Urek nanbuliah tampek baselo, batang gadang tampek basanda.
Dahan kuek buliah bagantung, daun rimbun buliah balindung, buah labek dapek dimakan.
Tampek balindung kapanasan, tampek bataduah kahujanan. nan bakato bana. Aiei janiah sayaknyo landai, ikan jinak hukumnyo adie.
Kaampek sako dinagari, nan manjunjuang sako adat, bilo ulama jo tuangku, nan tahu dihalal jo nan haram, sarato sah jo nan bata, suluah bendang adat limbago. Hulu balang jo ampang limo, jo manti pagawai adat, nan bak umpamo pagaran kokoh. Cadiak jo tahu pandai, nan arief bijaksano, tahu diangin nan basuruik, tahu diombak nan basambuang, sarato dahan kamaimpok, runciang kamancucuak, tahu dialamaik kato sampai, alun bakilek lah bakalam, takilek ikan dalam iamik, lah tantu jantan batinonyo.
Nan mudo pambimbiang dunie, nan capek kaki ringan tangan, capek kaki indak panaruang, capek tangan indak mamacah, aso tarantang duo sudah, nan bahati suci bamungko janieh, nan tahu dimalu jo sopan, sarato raso jo pareso, ancang ancang dalam nagari. Sarato kapado bundo kanduang, limpapen rumah nan gadang, sumarak dalam nagari hiasan dalam kampuang, nan gadang basa batuah, kaundang-undang ka Madinah, kapayuang panji kasarugo.
Sarato jo urang banyak, nan tidak baimbau namo sarato basabuik gala, nan dilingkuang barieh jo balabeh, didalam cupak jo gantang, dikanduang adat jo pusako. Ujuik tujuan buah rundiang, sakiro paham dikahandaki, bahubung jo maso nan ditampuah, musim nan tumbuah iko kini, syariatnyo ado bahakikat, Lahieh kulik manganduang isi. Lahieh manjadi buah ama, dek enggeran sako nan tatagak, Koto aman alam santoso, salamaik korong jo kampuang, nak aman anak kamanakan. Dunia buliah akhirat dapek, sinan mardeko mangkonyo panuah. Curai jo paparan, bukan mahunjuak maajari. Hanyo sakadar calak calak ganti asah. Kok salah mintak dibatua kan, kok panjang mintak dikarek, senteng mintak dibilai, kok kurang mintak ditukuak. Karano ulemu di Tuhan tasimpanyo. Kito nan bukan cadiak pandai.
Umur nan baru satahun jaguang, darah nan bain satampuak pinang. Tasingguang ka maiak, talantuang ka turun mohon maaf dimintak pado sanak.
Tidak ada komentar:
Posting Komentar